إحباط

يسعد صباح كل من دخل على مدونتي وشاف كتابتي
بالنسبه لتحويل المسار صارلي الحين فوق السنتين وانا انتظر موعدي في مستشفى مبارك الكبير - حولي - الكويت
والظاهر انه مستحيل عمل العمليه في القطاع الحكومي الا بواسطه او بعد الموت يمكن يشيلون من وزني عشان ادش قبري خفيف
مادري شلون اوصف لكم شعور واحد يبي يسوي عمليه جراحيه ويحطوله موعد بعد سنتين وبعدين لما تروح لهم يقولك ترى الموضوع الغرفه فيها جرثومه او مايكروب وقاعدين يطهرون غرفه العمليات وعليه تأجل موعد عمليتك بعد سنه الى سنه ونص
في هالحاله شتسوون؟؟
انا عن نفسي الظاهر اني ماراح اسوي العمليه في الكويت وان سويتها في الكويت بتكون عند دكتور خاص احسن وافضل
وبنشوف شنو يصير في هالسنه هذه يمكن يستجد اي جديد وعليه أقرر ما سأفعل...

تحويل مسار المعده: تحويل مسار المعدة

تحويل مسار المعده: تحويل مسار المعدة

google8949880c7a0ccb00.html

ادون ما سيحصل في عمليتي لكم

انا بقمة الشوق لعمل العملية هذه الصراحه ماني قادر انطر احس الايام صارت طويلة والوقت مايمشي ناطر رمضان هالسنه على نار لانه ان شاء الله اخر رمضان راح يكون لي وانا متين راح وبعده راح اتخلص من هالمعده الكبيره اللي عندي اللي مايبقى شي الا احطه فيها

ارجو من كل من يفتح الصفحه يدعيلي بالخير

تحويل مسار المعدة

الموضوع مبين من العنوان اظنتي صح؟
المهم انا بهالموقع ابي ابين موضوع عملية تحويل مسار المعده وهي احد العمليات الشائعة هذه الايام طبعا السمنه مرض هذا الزمان والكل يبحث عن علاج سحري للموضوع اظنتي ما في علاج سحري اكثر من عملية تحويل مسار المعده والي يقومون فيه الدكاتره حاليا عن طريق المنظار وليس فتح البطن كامله كما كان بالسابق علما بان هذه العملية موجوده في امريكا من الخمسينيات .
وبما اني احد المصابين بالسمنه المفرطه فاني قررت اروح مستشفى مبارك الكبير عشان اسوي العملية وبصراحه هذه هم لها قصه حلوه يعني مره كنت اراجع سفاره وشافني واحد كبير بالعمر فناداني واستأذني انه يكلمني في موضوع خاص ههه اولا انا شكيت بالموضوع ولكن بعدين تبين انه يبي يكلمني على موضوع السمنه وتأثيرها على الانسان قلتله حجي لاتتعب نفسك انا عارف كل هالكلام بس صدقني ماكو حل انا قلت ماكو حل جان يخزني الريال قالي شفيك انت انا اللي قاعد اكلمك كنت بنفس وزنك تقريبا والحين الحمدلله سويت عملية تحويل مسار وتغيرت حياتي كلها عاد قلتله شلون وين وقالي التفاصيل كله ماقصر وجزاه الله كل خير انه علمني الطريق وبعدين رحت المستشفى مبارك الكبير وحطيت موعد عند الدكتور باسل السميط عشان العملية طبعا هالكلام قديم شوي كان في شهر 2 /2008 وقابلني بابتسامه طيبه ماشاء الله عليه ورحب فيني وشجعني على هالفكره اللي في الكثير يشوفونها فكره جريئة تقريبا المهم عطاني التحاليل المفروض اسويها وسونار ورحت سويتها ورجعت على حسب موعدي قال الحمدلله مافي مانع انك تسوي العملية أنطر دورك الحين لانه في وايد ناس قبلك وناطرين دورهم والحمدلله بعد ماطلعت روحي عطوني موعد 20/10/2010 يعني بعد سنه ههههه بس ان شاء الله بروح بعد رمضان هالسنه واحاول اقرب الموعد شوي لانه على شهر 10 الجاي بكون الدبل عن جذيه هههه والحين عاد وبعد سوالفي لازم احطلكم الاراء العلمية بالنسبة للعملية وكلشي وفي ارتباطات حق فيديو لازم تشوفونه كل هذا مو الحين لانه تعبت بصراحه وباجر بكمل ان شاء الله
طبعا هي العملية عبارة عن قص المعده الى جزء صغير وباقي المعده تكون على صوب ثاني ويمتد الامعاء إلى الجزء الصغير المقصوص من المعده وبذلك ستكون معده المريض الجديده وبما انها صغيره جدا ولا يمكن ان تنتج عصارات المعده فيبقى الجزء الكبير من المعده بالصوب الثاني مقفل من الاعلى وموصل بالامعاء من الاسفل ومن الامعاء يوصل بالامعاء الممتده من المعده الجديده لكي تستفيد من العصارات التي تستخرجها المعده وبهالشي تكون قاعده بس تطلع عصارات للاكل اللي يبقى بالمعده الجديده ويتم الهظم في الامعاء بدل ان يكون في المعده مممم اعتقد هذه الصوره راح توضح كلامي اكثر

aكان ودي احط فيديو بس ماعرفت على ما اقدر احط فيديو راح ارفقه ان شاء الله وبهالموقع راح اقولكم شيصير معاي من ناحيه العملية بالكامل واول باول وان شاء الله تكون الفايده للجميع